НОВИ САД – Тарґовище формує цену жита, алє держава помогнє, бо Министерство польопривреди предложело робним резервом же би почали з интервентним одкупом жита, по предвидзеней цени од 18 динари, гварел вчера министер польопривреди и за„ити жив отного штредку Бранислав Недимович после схадзки з представителями здруженьох польопривреднїкох отриманей у Покраїнскей влади, на хторей з польопривреднїками бешедовал и покраїнски секретар за польопривреду, водопривреду и лєсарство Вук Радоєвич.
– Наздавам ше же будзе одкупене интервентне количество жита пре реґулованє ситуациї на тарґовищу и онєможлївйованя стваряня монополу, лєбо подобного – гварел Недимович. По його словох, Министерство ма активну комуникацию и з Комисию за защиту правох конкуренциї, хтора єдина овласцена ришовац питаня о тим чи єст монополи, картели и подобни справованя.
Недимович гварел же того року пошате менєй жита, алє же будзе досц за потреби держави, и же сиґурно будзе и коло милион тони за вивоз.
– Ми пририхтали и закон о реґулованю тарґовища польопривредних продуктох, як системни способ тирвацого ришованя же хто продукователь польопривредних продуктох, хто продуковательна ґрупация, хто одкупйовач и яки условия потребни же би ше дахто занїмал з одредзену дїялносцу. А нє же би ше кажде занїмал з чим сцигнє и пласовал информациї спрам своїх потребох, пред саму жатву, лєбо оберчку – гварел Недимович и наглашел же Министерство тото зопре.
Предсидатель Союзу здруженьох польопривреднїкох Банату Драґан Клеут гварел же за польопривреднїкох значне порозуменє з боку Министерства польопривреди.
– Реално, 18 динари по кили вельо лєпше як 14, алє наша продуковательна цена 22 динари. Наздаваме ше же з тоту интервенцию Министерство поруша тарґовище, же би ше звекшало цену и же бизме подмирели трошки продукциї – гварел Клеут и дополнєл же дума же би минимум 200 000 тони могли направиц пременки на тарґовищу.
Кед слово о предаваню жеми странцом, Недимович гварел же ше абсолутно проциви либералному тарґовищу з польопривредну жему.
– Запровадзиме огранїченя и так охранїме интереси Сербиї, на исти способ як то зробели и жеми членїци ЕУ – наведол Недимович, виражуюци наздаванє же мандатарка Ана Брнабич у своїм експозеу пошвеци увагу и тей теми.