КОВИН/ПАНЧЕВО – Гашенє огня на Делиблатскей писковини предлужене и вчера пополадню, а пременлїви витор и далєй очежує гашенє, преноша локални медиї.
Огень на Делиблатскей писковини ше ознова розбовчал, потим як ше примирел. У огню згорела и часц обєкту у спортско-рекреативним центру Чардак, котри ше находзи при месце Делиблато, преноши РТС.
Штаб за позарядово ситуациї сообщел же евакуовани часци места Шумарак, хтори були у опасносци пре ширенє огня. Як наведзене, у тей хвильки горя вецей як 900 гектари лєсу и нїзкого желєнїдла.
До акциї гашеня и локализованя огня уключени Републични штаб за позарядово ситуациї котри координує зоз тоту акцию, уключени и припаднїки Войска Сербиї зоз шицкима людскима и материялнима ресурсима, анґажовани и професийни и добродзечни огньогасци, роботнїки зоз ЯП Войводинашуме, а приключели ше и велї гражданє преноши портал 013info.rs.
Штаб за позарядово ситуациї општини Ковин преглашел позарядову ситуацию на часци општини, а пре огнї котри залапели Делиблатску писковину.
Гориц почало 2. авґуста, кед огень залапел поверхносц коло два гектари, локализовани є 3. авґуста, а дежурства предлужени и 4. авґуста. Медзитим 5. авґуста пре моцни витор и вельку горучаву хтора тирва уж днями, огень ше преширел у вецей напрямох.