Новорочни жаданя

автор лариса оноди
862 Опатрене

Тото цо ше пред тижньом случело на конференциї на котрей представена анализа о родних стереотипох и родно заснованим насилстве, на Медзинародни дзень солидарносци, представя, по моїм думаню, поражуюци факт и реалну слику о тим яке становиско векшини у нашим околїску о ровноправносци.

Як пренєсли медиї, на конференциї представени резултати цо о родних улогох и родно заснованим насилстве думаю дзивки зоз пейцох городох у Сербиї. Податки указали же велька часц дзивкох дума же ше цалком витворя аж док народза дзецко, и же главна улога жени же би ше жертвовала за свойо дзеци. Одредзена урядова особа  – хлоп – котри як функционер спред министерства бул на тей конференциї, указал тото процив чого ше даєдни державни и орґанизациї цивилного дружтва намагаю бориц – подполнє нєпочитованє женох. Вон вербално увредзовал єдну з присутних женох (а зоз тим и шицки други) – повторйююци єден зоз стереотипох же, ниа, анї єдна жена нє зна добре авто вожиц, а потим ю ище и чапнул по задку зоз паперами котри мал у рукох! Нєвладова орґанизация котра орґанизовала сход такой обвисцела ресорне министерство о його справованю котре нєприлаплїве и потвердзує нєровноправносц хлопох и женох у нашим дружтве.

Чи тот чловек котри себе дал за право на таки способ понїжиц жени будзе покарани чи нє, нє знам, алє знам же векшина з хлопох котри так думаю и робя нїґда нє санкционовани, прето же вони твердза же ше вони на таки способ „лєм шаля”. Нє знам як би тоти исти реаґовали кед би ше улоги обрацели – кед би жени хлопом коментаровали яки су пооблєкани або кед би их увредзовали и приповедали понїжуюци вици. Достали би епитети яки ше нє споминаю у новинох.

Понеже законченє старого року нагода же би ше пожадало дацо нове и лєпше у наиходзацим, жадам шицким женом же би нас нє мушели щициц закони. Най дружтво пременї становиско и насправди почнє прилапяц жени и хлопох як цалком ровноправних. Най хлопи престаню тримац жени за свойо власнїцтво, най престанє насилство над дзивчатми и женами. Дзивком и женом жадам же би себе престали доживйовац як особи котри ше муша жертвовац за других. Най постаню свидоми же ше мушиме закладац за себе. За свойо права. Нїхто то нє пороби место нас.

ПОВЯЗАНИ ТЕКСТИ