РУСКИ КЕРЕСТУР – Нєшка на Драмским мемориялу Петра Ризнича Дядї одбавена штварта по шоре, а треца дзецинска представа зоз Коцура „Кудлик пудлик чека ґазду” по мотивох приповедки Штефана Гудака котру пририхтали дзеци драмскей секциї КУД „Жатва”, а режию и текст подписує Микола Шанта.
Єденацчлена ґлумецка екипа представела животну приповедку напущених животиньох, кед пшичка Кудлика пудлика ґазда вируцел на улїчку и хто му шицко помогнул, та як ше добре з добрим враца. У представи визначена гуманосц, заєднїцтво и важносц помагац другим.
Улогу Кудлика пудлика бавела Марина Медєши, одруцени пшичок Звишко бул Марко Стрибер, одруцени кандурик Мишко бул Ален Мученски, манди пшичок бул Матия Макша, а старого одруценого пса Єдноокого ґлумел Микола Шанта. Врану ґлумела Теодора Ґайдош, страку Весна Билня, а папаґая Атила Байор. Пейцрочне дзивче Павлинка була Мая Ґайдош, а єй родичи були Сара Горняк и Роберт Макаї.
Наступела и пейцчлена танєчна ґрупа у составе – Катарина Ґайдош, Сара Ґайдош, Анастазия Ґойков, Сара Горняк и Мая Ґайдош, котрих на ритмичней секциї пририхтала Силвия Маґоч, а у представи були часц Звишкових здогадованьох як ше танцовало у Руским доме.
Автентични и ориґинални костими направел Креативни центер „Маґични швет” зоз Нового Саду, задлужена за сценоґрафию була Єлена Дудаш, а шептачка Силвия Маґоч.
Вецей фотоґрафиї мож поопатрац у нашей фотоґалериї.
