РУСКИ КЕРЕСТУР – Туристично-привредно-културна манифестация „Днї керестурскей паприґи” шветочно отворена на 17,30 годзин.
Спред Здруженя паприґарох „Капсикум анум” шицких госцох привитал Владимир Варґа, потим заменїк предсидателя Општини Кула Кароль Валка, а спред Покраїнского секретарияту за польопривреду. водопривреду и лєсарство Милош Шешлия.
Пред тим, а по законченю обиходу польох з паприґу, у центру валала могло поопатрац поставени штанди, на котрих представени продукти з паприґи, паприґа, нашеньски и осиґуруюци хижи, як и числени компаниї котри предаваю репроматериял за польопривреду, рижни предмети своєй роботи, лакотки и др.
Домашнї конїцки клуб „Русин” и його госци предефиловали през центер валала на шейсцох парадних запрагох.
У програми наступели госцуюци шпиваче з Медзилаборцох зоз Словацкей, єдна ґрупа з Подкарпатя, Дзивоцка и хлопска ґрупа, та и наймладши танцоше рускокерестурского Дома култури.
Конферансу водзел Емил Няради, котри привитал числених госцох, як домашнїх так и госцох з Словацкей, Польскей, цалей Войводини и южней часци Сербиї дзе червена рогова паприґа тиж свойофайтови бренд.
Главни орґанизаторе Манифестациї Здруженє паприґарох „Капсикум анум” и Конїцки клуб „Русин”, а тогорочна манифестация ше отримує з потримовку Општини Кула и Покраїнского секретарияту за польопривреду, водопривреду и лесарство, и числених локалних спонзорох.