МИКЛОШЕВЦИ – У Миклошевцох, у Горватскей, 26. и 27. авґуста отримана 32. Културна манифестация „Миклошевци 2017”, у орґанизациї домашнього КУД „Яким Ґовля”, а под покровительством Совиту за национални меншини Републики Горватскей (РГ) и сопокровительством Општини Томповци и Союзу Русинох РГ.
Централни програми Манифестациї „Поздрав ровнїни” (смотра фолклору) и „Вечар рускей шпиванки” отримани внєдзелю, 27. авґуста пополадню и вечар, а госцох привитали предсидатель КУД „Яким Ґовля” Славко Ждиняк, котри и доначалнїк Општини Томповци, тиж и началнїк спомнутей општини Здравко Звонарич, док програму отворел член Совиту за национални меншини РГ Звонко Костелник.
На смотри фолклору на „Миклошевцох 2017” наступели осем КУД – домашнє „Яким Ґовля” зоз шицкима своїма секциями, КУД „Яким Гарди” з Петровцох зоз Хлопску шпивацку ґрупу, КУД „Осиф Костелник” з Вуковару, КУД Руснацох з Винковцох, „Рушняк” з Риєки и „Руснак” з Петровцох. Як госци наступели мадярске КУД з Чаковцох и горватске дружтво з Товарнїку.
На отвераню нєдзельовей програми державну гимну и шветочну шпиванки Руснацох у РГ, як и „гимну” Манифестациї на концу „Вечару рускей шпиванки”, вєдно з домашню Женску шпивацку ґрупу, одшпивал о. Янко Колошняї з Канади, котри у чаше док службовал и жил у тим месце водзел шпивацку ґрупу з Миклошевцох. Патраче их наградзели з моцним аплаузом и придружели им ше у шпиваню.
Двогодзинову танєчну програму водзели Матей и Анамария Мудрого, а на „Вечаре рускей шпиванки” участвовали дзеци-шпиваче Клара и Кристиян Миклошово зоз Сотину, шпиваче и ґрупи з местох дзе жию Руснаци у Горватскей и у Сербиї – Михаил Грищук з Петровцох, Владимир Провчи з Матульох, Женска шпивацка ґрупа з Миклошевцох и дебитантски дует Паула Поточки и Милица Мишлєнович з Миклошевцох.
З Петровцох на „Вечаре” наступели Михал Голик и Аня Грищук, док КУД Руснацох Осиєк наступело з оркестром, з инструменталнима мелодиями, под руководительством Ивана Лїкара. На тей програми шпивали и Мария Закалюк з Райового села, котра источашнє и руководителька хору КУД „Осиф Костелник” з Вуковару.
Зоз Сербиї на „Вечаре рускей шпиванки” участвовала Младша шпивацка ґрупа КПД „Дюра Киш” зоз Шиду, котра виведла барз удатни венчик руских шпиванкох, под руководительством Наташи Еделински Миколка. На тей програми конферансу водзела Сабина Ждиняк.