ВЕРБАС – Стреду у Вербаше отримана 12. схадзка локалного парламенту на хторей як назначнєйши точки прилапени Одлука о закончуюцим рахунку буджету Општини Вербас за 2017. рок и Одлука о ребалансу буджету Општини Вербас за 2018. рок.
Предложени ребаланс обгрунтовал предсидатель Општини Милан Ґлушац, и гварел же плановани вкупни приходи буджету з Одлуку о ребалансу виноша 1 907 454 831 динари, док з Одлуку о буджету за 2018. рок виношели 1 489 708 027 динари.
– Найвекша причина такого звекшаня и на приходним и на розходним боку нове рефинансованє длугорочного кредиту, визначел з тей нагоди Ґлушац.
ОКрем тих одлукох, одборнїки прилапели и Предкладанє одлуки о явних паркинґох, Предкладанє одлуки о розпорядку, початку и законченю роботного часу у Апатики „Вербас”, Ришенє о даваню согласносци на вименки финансийного плану Културного центру Вербас за 2018. рок.
Попри тим, на дньовим шоре бул и звит о реализациї Рочного и финансийного плану роботи за роботни 2017/2018. рок Предшколскей установи „Бошко Буха”, предкладанє ришеня о даваню согласносци на Програму роботи тей установи зоз финансийним планом за роботни 2018/2019. рок и друге.
