РУСКИ КЕРЕСТУР – Терашнє Здруженє ремеселнїкох и приватних поднїмательох Руского Керестура предлужує традицию дакедишнього Здруженя ремеселнїкох, так же вчера, 8. януара (понеже то дакеди було на Богоявлєнє, односно Трокралї), отримало порядну Рочну Скупштину, уж 183. по шоре.
Попри даскелїх старших майстрох-пензионерох, котри и почесни члени Здруженя, на схадзки, медзи другима привреднїками, присуствовали и коло 15 младши, односно терашнї керестурски поднїмателє штреднїх рокох, директор Реґионалней привредней комори (РПК) Зомбор Зоран Булатович, предсидатель Общого здруженя поднїмательох Кула Сувеиль Кариманович, секретар Месней заєднїци (МЗ) Руски Керестур Михайло Сабадош и представителє дзепоєдних керестурских здруженьох.
Зоз Скупштину предшедовал секретар Здруженя Дюра Сабадош, звит о роботи у прешлим року поднєсол предсидатель Здруженя Владимир Емейди, а финансийни звит заменїк предсидателя др Михайло Семан и касир Янко Семан. У звиту о роботи Емейди, медзи иншим, окреме визначел представянє старих ремеслох на прешлорочним Керестурскимо сайме, а и вон и други присутни за тото окреме похвалєли закладанє старих керестурских майстрох и подзековали им на барз удатней презентациї дакедишнїх ремеселох.
Попри Керестурского сайму, хтори орґанизовани вєдно зоз Здруженьом женох „Байка”, керестурски поднїмателє орґанизовали традицийни Майсторски бал, роботню за виробок витражох, орґанизовали екскурзию до Шиду, участвовали на Дньох керестурскей паприґи, участвовали на вецей преподаваньох и семинарох, а роботу Здруженя потримовали ресорни покраїнски секретрияти, Аґенция за розвой Општини Кула и керестурска МЗ.
У звиту визначене же Здруженю прешлого року кнїжки подаровали Юлиян Пап и Ирина Папуґа, а план роботи за тот рок подобни як прешлорочни и, як поведзене, його витворенє будзе завишиц и од доставаня средствох. Здруженє дїловало позитивно, бо приходи були 187 000 дин., дзе и з членарини 26 000, а до того року пренєшени 43 000 динари.
Здруженє потрима и уключи ше до будуцей Локалней акцийней ґрупи на уровню кулскей општини, хтора ше будзе старац о руралним розвою, а директор РПК Зомбор Булатович присутним потолковал новосци у роботи Комори на основи нових законских предписаньох хтори ше примєнює од початку того рока. Секретар МЗ Сабадош визначел же Здруженє и того року од МЗ достанє порядну дотацию, бешедовал о нових условийох роботи МЗ, як и же 31. януара виходзи терашнї самодопринос.
Визначене и же познати Майсторски бал того року будзе отримани 21. януара у керестурским Ресторанє „Червена ружа”, на хтори поволани шицки поднїмателє, алє и други заинтересовани.