РУСКИ КЕРЕСТУР – Катедралну церкву св. оца Миколая всоботу, 14. Октобра, нащивели паломнїки з Раєвого Села, зоз своїм парохом о. Олегом Сагалюком, а того дня пред тим були у нашей церкви у Коцуре, нащивели и Суботицу, єй храми и даєдни городски знаменїтосци и Палич.
У Керестуре их дочекал капелан о. Михайло Шанта и у Катедралней церкви их кратко упознал з єй историятом, як и специфичносцами самей парохиї.
По виходу зоз церкви тамбурова орхестра зоз КУД „Цвелферия” з Раєвого Села виведли три руски шпиванки, як дарунок домашнїм, а потим обишли и крипту дзе поховани нашо владикове.
Медзи 50 паломнїками рижних ґенерацийох, попри Руснацох, було и вирних римокатолїкох зоз того места хторих тиж обслужує о. Сагалюк, як и поєдинцох з дзепоєдних других околних местох чийо вирни припадаю до парохиї у Раєвим Селу.
По словох їх пароха о. Сагалюка, зоз тим паломнїцтвом злучели нащиви местом за духовне збогаценє, нащиви местом одкаль коренї їх предкох, а тиж и же би презентовали свою културу хтору пестую у своїм КУД-у.
