НОВИ САД – Вчера, 28. авґуста, у просторийох Заводу за културу войводянских Руснацох, отримане стретнуце представнїкох Дружтва за руски язик, литературу и културу зоз проф. др Вейлсом Браунийом зоз Корнел универзитету з Ню Йорку у Зєдинєних Америцких Державох, а потим и зоз директорку Заводу за културу ВР Анамарию Ранкович и другима заинтересованима.
Спред Дружтва за руски язик зоз професором Браунийом ше стретли Ирина Папуґа, котра наглашела же до того стретнуца пришло дзекуюци Гавриїлови Колєсарови зоз Канади, а мр Гелена Медєши зоз госцом бешедовала о линґвистичних питаньох.
Причина приходу професор др Вейлса Брауния до Сербиї було участвованє на Медзинародним конґресу славистох у Беоґрадзе. Заняти є на Корнел универзитету на департману за линґвистику, а у линґвистичним виглєдованю найбаржей го интересує сербскогорватски язик.
Брауни писал и до Часопису за литературу, културу и уметносц „Шветлосц“ (ч. 3/2008), а остатню роботу у вязи зоз руским язиком обявел под назву „Порядок енклитикох у язику войводянских Руснацох”.
