РУСКИ КЕРЕСТУР – Вчера, 21. марца, на тогорочним Драмским мемориялє Петра Ризнича Дядї першу дзецинску представу з його репертоару – „Приповедки зоз Коцкогороду”, по тексту Културного центру ЦЕКОМ зоз Зренянину, а у режиї Нади Лєндєр – виведла Дзецинска драмска секция Руского КУД „Др Гавриїл Костельнк” з Кули. Текст на руски язик преложел Янко Лендєр.
Дїя представи ше збува у „Коцкогороду”, дзе ше попри шицких „коцкастих” жительох народзело дзивче у випатрунку „лабди”. Понеже було иншаке, же би було любене, було порихтане зробиц шицко пре пременку свойого випатрунку и буц як и други.
Кулски дзеци удатно пренєсли поруку представи же нє шицко у вонкашнїм випатрунку, же кажде розлични и єдни других маме прилапйовац таки яки су, окреме з почитованьом характерних вредносцох каждей особи.
У представи бави уж стандардна екипа младих ґлумцох кулского Дружтва – Дияна Канюґа, Весна Вонич, Себастиян Гарди, Мирослав Стричко, Желько Стричко, Ненад Митрович, Дариян Гарди и Алекса Митрович.
Сценоґрафия за представу колективна, музику вибрал Мирослав Стричко, майстор шветла Янко Лендєр, а тону Петар Брил.
Полна сала з публику одушевено прилапела представу, а медзи домашнїма патрачами були и школяре з Коцура и зоз Шиду, Бикичу и Беркасова, чий приход орґанизовал Одбор за образованє Националного совиту Руснацох.
Вчерайшу представу у Керестуре патрел и селектор Општинскей смотри дзецинскей драмскей творчосци у кулскей општини Владимир Надь Ачим, та з тим участвовала и на Општинскей смотри.
(Вецей фотоґрафиї з представи Кулянцох у фото-ґалериї на правим боку сайту).