БЕОҐРАД – З нагоди вчерайшого Медзинародного дня безпечного интернету, у Сербиї почала акция „З информацию процив диґиталного насилства” пре звекшанє диґиталней писменосци и превенциї насилства на интернету над дзецми. Акцию запровадзує Центер за унапредзенє култури, живота и роботи, а тирва три мешаци.
Плановене емитованє едукативних спотох на електронских медийох, як и орґанизованє трибинох у векших городох, же би дзеци и родичи препознали опасносци од хаснованя дружтвених мрежох.
Скоро 90 одсто дзецох возросту од 10 до 15 роки ма мобилни телефон, а векшина з нїх порихтана охабиц особни податки на интернету, аж и адресу биваня, обявела нєвладова орґанизация „Охраньме дзеци” з нагоди Медзинародного дня безпечного интернету.
Резултати прешлорочного виглєдованя тей орґанизациї о справованю и звикнуцох дзецох на интернету указали же векшина каждодньово хаснує информацийно-комуникацийни технолоґиї и ґу интернету приступа уж од дзевятого року, а скоро шицки дзеци на интернет иду прейґ мобилного телефона. Орґанизация жада указац на безпечносни виволаня котри представяю масовне хаснованє информацийно-комуникацийних технолоґийох.
У Сербиї 27. фебруара з роботу почнє и окремни Национални кол-центер за безпечносц дзецох на интернету, наявела державна секретарка у Министерстве тарґовини, туризму и телекомуникацийох Татяна Матич з нагоди Медзинародного дня безпечного интернету.