ШИД – На вчерайшей схадзки Скупштина општини (СО) Шид принєсла одлуки о прилапйованю Звитох о роботи шицких месних заєднїцох у шидскей општини за 2017. рок, як и Програми роботи и Финансийни плани за 2018. рок.
СО принєсла одлуку о анґажованю екстерного ревизора, розришела потерашнїх членох општинского Совиту за здравє и Совиту за занятосц и меновала нових членох.
Место Вери Цикуши, членїци Општинскей ради хтора задзековала на тоту функцию пре особни причини, одборнїки меновали Деяна Коїча, дипломованого инженєра польопривреди, хтори будзе на стаємней роботи.
Одборнїки вигласали и нови одлуки о локалних административних таксох, меновали двох нових членох Управного одбору Центра за социялну роботу и розпатрела мири за зменшованє числа псох и мачкох блукачох на улїцох.
Єдна зоз значних одлукох и то же будзе основана Канцелария за зменшованє худобства хтора оможлїви же би роботно способни особи хтори глєдаю єднократну пенєжну помоц робели на дружтвено хасновитих роботох и так одробели достату помоц.