Прилапени проєкт двоїх керестурских штредньошколцох

автор мар
1.1k Опатрене

РУСКИ КЕРЕСТУР – На основи власного проєкту за унапредзенє настави з хемиї, физики и ґеоґрафиї у рускокерестурскей Штреднєй школи „Петро Кузмяк”, школяре штвартей класи руского оддзелєня Ґимназиї Милица Кнежевич и Тадей Малацко достали средства по Конкурсу Униї штредньошколцох Сербиї и вчера, 15. септембра, свой проєкт представели Школярскому парламенту.

У прешлим школским року Милица Кнежевич и Тадей Малацко у Беоґрадзе присуствовали на едукативней презентациї и роботнї хтору орґанизовала Уния штредньошколцох Сербиї, вєдно з 200 штредньошколцами зоз 183-ох штреднїх школох, чийо парламенти членїци Униї.

По законченю тих презентацийох и роботньох, керестурски школяре одлучели написац проєкт, з хторим конкуровали до фонду Униї з назву „Штредньошколци за штредньошколцох”, по хторим им одобрени 35 000 динари за унапредзенє настави. З того пенєжу будзе обезпечени одредзени репроматериял за експерименти з хемиї и физики, як и мапи за наставу ґеоґрафиї у керестурскей Школи.

До конца фебруара Милица и Тадей, у сотруднїцтве з професорами, буду орґанизовац и Фестивал науки у рускокерестурскей Школи, цо тиж єдна з активносцох того їх проєкту.

Школяре, як члени Школярского парламенту Штредней школи „Петро Кузмяк”, до Униї штредньошколцох Сербиї кажди рок пишу проєкт и то други за хтори им одобрени средства. Керестурска Школа у тей униї од 2003. року.

 

 

ПОВЯЗАНИ ТЕКСТИ