ДЮРДЬОВ – Тогорочни Фестивал жридлового шпиваня „Най ше нє забудзе” будзе отримани 18. авґуста, а прияви за участвованє тирваю по нєдзелю, 5. авґуст на имейл matka.djurdjov@gmail.com.
До вчера прияви сцигли зоз Петровцох и Вербасу, а домашнї очекую же ше привя шицки нашо дружтва котри пестую жридлово шпиванє.
– Пропозициї за облєчиво и шпиванє остали исти – жени, дзивки и хлопи маю буц облєчени до руского народного шветочного облєчива, жени вивязани до фитюли або баршоня, а хлопи з калапом на глави. Наступ и далєй огранїчени на седем минути за два шпиванки по ґрупи, єдна акапела и єдна у провадзеню оркестра, гварел Мирослав Такач, предсидатель Управного одбору домашнього КУД „Тарас Шевченко”.
Окрем змагательней, на Фестивалу будзе и ревиялна часц, а орґанизаторе з дюрдьовского дружтва и того року планую отримац интеракивну виставу Стари ремесла опрез свойого будинка и тематску виставу у Рускей школи.
Фестивал жридлового шпиваня „Най ше нє забудзе” почнє на 20 годзин у Задружним доме, а пред тим, у пополадньових годзинох, буду отворени обидва спомнути вистави.