СРИМСКА МИТРОВИЦА – Уж по традициї, у сримскомитровицкей парохиї ше пред Вельконоцним постом отримує Пущанє – карневал за дзеци, та так було и внєдзелю 26. фебруара, дознава Рутенпрес од пароха у Сримскей Митровици о. Владислава Варґу.
На тот завод участвовали 22-йо дзеци з Митровици и Латярку, а попри тим же були маскировани, дзеци ше змагали и у вецей рижних бавискох и у виронаучним квизу. Побиднїки у бавискох и квизу достали награди, як и за найудатнєйши маски.
Програму водзели Славица и Фечко Канюґа, Даниєла Горняк и Моника Абодї Митрович, а по програми було друженє за дзеци и їх родичох.
Як гварел о. Варґа, з маскенбалом були одушевени и родичи дзецох, дїдове и баби, котри наглашели же таки друженя у церкви потребнєйше частейше отримовац же би ше дзеци лєпше упознали.