НОВИ САД – Вовторок, 31. октобра, отримана Штварта схадзка Управного одбору Заводу за културу войводянских Руснацох.
Схадзку водзел предсидатель Управного одбору Миломир Шайтош, а на дньовим шоре було седем точки.
У фокусу схадзки бул предклад лїстини кандидатох за вибор директора Заводу за културу войводянских Руснацох, як и прилапйованє одлуки о вименкох и дополнєньох финансийного плану и програми роботи Заводу за 2017. рок.
Предсидателька Конкурсней комисиї и членїца УО Заводу Миряна Дєкич упознала присутних зоз записнїком, дзе констатоване же од трох приявох зоз явного конкурса за директора, условия виполнєла лєм єдна кандидатка.
Слово о терашнєй о. д. директорки Анамариї Ранкович. Члени УО Заводу потим зоз Ранковичову, як єдину кандидатку, окончели розгварку-интервю, а обгрунтованє о резултатох конкурса будзе прешлїдзене Националному совиту Руснацох.
По процедури за вибор директора Заводу за културу войводянских Руснацох, Национални совит Руснацох предклада кандидата за директора Покраїнскей влади, котра го потим менує.
Национални совит Руснацох о предкладу кандидата за директора Заводу би требал розправяц на наиходзацей схадзки, котра будзе отримана початком новембра.