НОВИ САД – У познатим репрезентативним просторе за музични збуваня у Новим Садзе – у Синаґоґи, Хор „Гармония” з Нового Саду вчера, 5. мая, з концертом з назву „Хор Гармония – нашо дзешец роки”, пред вельким числом публики и зоз госцами-учашнїками означел дзешецрочнїцу свойого постояня и роботи.
На початку тей музичней програми, отриманей и виведзеней на квалитативно високим уметнїцким уровню, под дириґенством Весни Кесич Крсманович вецей духовни композициї вєдно одшпивали „Гармония”, Хор „Розанов” з Дюрдьова и Мишани вокални ансамбл оперских шпивачох „Класика Нова” з Нового Саду, а потим зоз своїма вибранима точками спомнути хори наступели и окреме.
Попри ансамблу „Класика Нова”, у хторим шпива и Агнета Тимко Мудри, та дюрдьовского Хору „Розанов”, под дириґенством Татяни Барна, на вчерайшим концерту шпивала и Хлопска шпивацка ґрупа „Фант’є” з Нового Саду, под руководительством Борута Павлича.
Ювилант, Хор „Гармония”, виведол вецей духовни, народни и шветово познати композициї, под дириґентством Весни Кесич Крсманович, як и своєй першей дириґентки Сузани Ґрос Маркович. Як солисти на концерту наступели члени „Гармониї” Гелена Папуґа и Ана Римар и оперна шпивачка Свитлана Декар, дзепоєдни музични точки на клавиру провадзел Йожеф Ритер, а на гармоникох Владимир Сивч и Давор Сабо.
През конферансу, хтору водзели Марина Сакач и Мария Римар, публика упозната з историятом и роботу „Гармониї” и єй госцох-учашнїкох на концерту, а свойо упечатки о роботи з тим хором на концу програми винєсла и перша дириґентка Сузана Ґрос Маркович.
Духовному оцови Хору „Гармония” о. Романови Мизови з Нового Саду, двом спомнутим дириґентком Хору, Рускому културному центру и Грекокатолїцкей парохиї св. апостолох Петра и Павла з Нового Саду, як сновательом Хору, на концу програми уручени и окремни подзекованя, а подзекованя уручени и солистком на тим концерту.
Попри велїх почитовательох музики и хорского шпиваня, зоз своїм присуством ювилей Хору „Гармония” повинчовали и наш апостолски еґзарх, владика Георгий Дджуджар, заменїк предсидателя Националного совиту (НС) Руснацох Йовґен Мудри, предсидатель Вивершного одбору НС Желько Ковач и дзепоєдни священїки з наших парохийох.