НОВИ САД – На шветочносци з нагоди отвераня 60. Змайових дзецинских бавискох у Спомин хижи дзецинского писателя Йована Йовановича Змая у Сримскей Каменїци, вчера уручени и традицийни награди Бавискох найзаслужнєйшим дзецинским писательом, а єдна з добитнїкох и наша писателька за дзеци Мелания Римар, редакторка дзецинского часопису „Заградка”.
Римарова достала Награду за популаризацию литератури за дзеци Змайових дзецинских бавискох, а попри нєй, Деянови Алексичови уручена Змайова поетска палїчка, Владислави Войнович Змайова награда за творче доприношенє и Миряни Стефанович Змайова награда за позарядове доприношенє у дзецинскей литератури.
– Награда ми вельо значи и велька чесц же сом ю достала. Насампредз и прето же препознати и припознати мойо намаганя у приблїжованю нашей, рускей литератури другим, а тиж и сербскей и литератури других националних заєднїцох нашим дзецом. То тиж єден зоз способох за їх зблїжованє и упознаванє, прейґ дзецинскей литератури – гварела Мелания Римар.
Програма „Змайових дзецинских бавискох” почала вчера, а тирва по нєдзелю, 11. юния.
