НОВИ САД – Управни одбор (УО) НВУ „Руске слово” на схадзки отриманей 13. юлия, принєсол одлуку о розписованю Явней поволанки за вибор директора НВУ „Руске слово”, хтора отворена од нєшка, 27. юлия, а обявена є у новинох ч. 30 (з датумом друкованя 27. юлий 2018. рок), и на сайту Установи. Директора ше вибера на штири роки з можлївосцу же би бул ознова вибрани.
Попри общих условийох яки предписани зоз Законом о роботи, кандидат за директора треба же би сполнєл и шлїдуюци окремни условия – же би мал закончену високу фахову приготовку (VII ступень), найменєй три роки роботного искуства у обласци информованя, лєбо на роботох руководзеня и знанє руского язика.
О шицких условийох и потребней документациї мож ше информовац у новинох ч. 30 и на сайту Установи, а заинтересовани кандидати треба же би послали свою прияву УО на адресу НВУ „Руске слово”, Булевар ошлєбодзеня 81/ VII, 21 000 Нови Сад, з надпомнуцом „За Явну поволанку за директора НВУ „Руске слово”. Конкурс отворени 15 днї.