БЕОҐРАД – Нова форма меншинского Окремного виберанкового списку представена стреду, 13. юния, у Народней скупштини Републики Сербиї посланїком Одбору за людски и меншински права и представительом националних совитох националних меншинох.
Министер за державну управу и локалну самоуправу Бранко Ружич представел унапредзену форму Окремного виберанкового списку, хтора ше будзе ажуровац автоматично, после вименкох котри порядно прешлїдзує полиция и матичар.
Унапредзену форму Окремного виберанкового списку министер Ружич представел вєдно зоз державним секретаром Иваном Бошняком и помоцнїцами Ивану Антич и Марину Дражич.
Тоти перменки у Окремним виберанковим списку важни за виберанки за национални совити националних меншинох, котри по закону муша буц розписани по 27. авґуст, а отримани по 4. новембер того року.
Спред рускей националней меншини на едукациї була народна посланїца Олена Папуґа, а спред Националного совиту Руснацох предсидатель Вивершного одбору Желько Ковач.
– На хиби и нєлоґичносци коло самого виберанкового процесу и окремного виберанкового списку указовала сом през посланїцки питаня, та Министерство за державну управу и локалну самоуправу тото уважело и до нового виберанкового процесу ше войдзе з новима унапредзенима правилами – гварела за „Рутенпрес” народна посланїца Олена Папуґа.
До Окремного виберанкового списку ше уписує, як и по тераз, зоз виполньованьом формулара и придаваньом (або посиланьом прейґ пошти) до општинскей управи.
Скорей ше у меншинским Окремним виберанковим списку автоматично нє ажуровало вименки адресох и презвискох, як цо случай у общим Єдинственим виберанковим списку, алє представнїки националних меншинох мушели сами пойсц до матичней служби же ше им пременєло тоти податки.
Кажди гласач може превериц же чи є уписани у Окремним виберанковим списку, так же унєшє свойо єдинствене матичне число на сайт: https://pbs.ljudskaprava.gov.rs:85/