ВЕРБАС – У Вербаше стреду, 11. януара почал Шести Куп нацийох – турнир А катеґориї у боксу за жени. Турнир тирва по 15. януар, а на нїм ше змагаю коло 150 аматерски боксерки зоз аж 22-ох жемох швета. Турнир отворел предсидатель Општини Вербас Милан Ґлушац а на отвераню бул и шветочни дефиле шицких учашнїцох, пише портал Општини Вербас.
Учашнїци подзелєни до вецей катеґорийох, та ше змагаю дзивчата школского возросту, юниорки, млади дзивки и сениорки, котрих єст и найвецей.
Змаганє орґанизоване по нових АИБА правилох, так же змагательки боксую три раз по три рунди, чийо тирванє завиши од катеґориї, а при преглашованю побиднїци ше бере збир бодох шицких пейц судийох.