КОЦУР – У коцурскей Основней школи (ОШ) „Братство єдинство” пияток, 1. децембра, отримана презентация Карловацкей ґимназиї. Школяром осмей класи Ґимназию представели професорка французкого язика Милица Француз и Єлена Марянович, професорка литератури.
Професорка Милица Француз школярох упознала зоз историю Карловацкей ґимназиї, як и напрями и билинґвалну програму. Осмаки од професорки Француз могли дознац о звонканаставних активносцох и о сотруднїцтве зоз школами у иножемстве.
У другим сеґменту промоциї, професорка литератури Єлена Марянович школярох упознала зоз рижнима манифестациями котри ше отримує у Карловацкей ґимназиї, указала им два публикациї котри видава Ґимназия и приблїжела предмет котри преподава. Потим, приказани кратки документарни филм под назву „Дух” о живоце у Карловацкей ґимназиї, котри направела єдна школярка Ґимназиї.
Бувша школярка ОШ „Братство єдинство” Марина Тодич, котра ше того року уписала до Карловацкей ґимназиї, з угла школярох приблїжела живот, нє лєм у Ґимназиї, алє и у Новим Садзе, у Доме школярох „Бранково коло” и друженю звонка школи.
Школяром були найинтересантнєйши два роботнї котри отримали Маева Колавино и Инес Кербуа, два странски лекторки за французки язик при Французкому институту з Нового Саду, а котри сотрудзую у настави на французким язику у Карловацкей ґимназиї. У першей роботнї школяре преверйовали же кельо знаю о французкей култури и символох, а у другей роботнї задаток бул през рижни питаня и задатки пренайсц благо на мапи Европи.
Промоцию Карловацкей ґимназиї иницировала и орґанизовала Мария Паїч, наставнїца французкого язика у ОШ „Братство єдинство”.
