КОЦУР – У Етно клубе „Одняте од забуца” у Коцуре вчера, 18. мая, зоз отвераньом вистави 44 молитвенїкох и псалтирох почала тродньова манифестация котра ше отримує у рамикох манифестациї „Ноц музейох”.
О молитвенїкох котри нащивителє могли видзиц бешедовал коцурски парох о. Владислав Рац, а шестра Михаїла Воротняк визначела же кельо молитва важна за каждого чловека и прецо важни тоти зачувани молитви. З кратку програму участвовали и виронаучни дзеци котри вимодлєли дзецински молитви.
У нєшкайшей програми у рамикох манифестациї „Ноц музейох”, на 20,30 годзин будзе приказана монодрама „Милионерка”, котру одбави Амалия Ковач спред РКУД „Др Гавриїл Костельник” зоз Кули.
На ютре Етно клуб будзе отворени цали дзень, та шицки котри нє могли присц на отверанє, годни видзиц як випатра найстарши виложени молитвенїк друковани 1860. року и найстарши псалтир з 1852. року.
