РУСКИ КЕРЕСТУР – У Штреднєй школи „Петро Кузмяк” у Руским Керестуре вчера вечар дочекали госцох зоз (за тераз) штирох школох хтори пришли на Стретнуце школох УНЕСКО-клубох Сербиї за школски 2016/17. рок, а нєшка можлїви приход ище даєдних поволаних школох.
Директорка домашнєй Школи Хелена Пашо Павлович и орґанизаторка Стретнуца у Керестуре Любица Няради привитали представительох школярох и їх наставнїкох з ґимназийох з Бачкей Паланки и Беоґраду, Ґимназиї и погосцительней школи з Врнячкей Банї, я и домашнїх школярох з Ґимназиї и Туристичного напряму.
У привиту домашнї представели Руснацох и Керестур, домашню Школу и дзепоєдни єй активносци, насампредз пририхтованє за участвованє у проєкту ЕУ „Твоя Европа, твой глас”, а госци поопатрали Школу и музейну збирку у Замку.
Нєшка на програми Стретнуца представянє роботи Федерациї УНЕСКО-клубох Сербиї, рускей националенй заєднїци, госцуюцих школох и прикладох добрей пракси у роботи УНЕСКО-клубох.
За госцох будзе пририхтани и вистава сувенирох и других роботох керестурского Здруженя женох „Байка”, буду им предложени традицийни руски єдла, орґанизовани поетски вечар, а Стретнуца буду закончени на ютре, 26. марца, з евалуацию и предкладанями за дальши активносци.
