РУСКИ КЕРЕСТУР – Нєшка на Драмским мемориялу Петра Ризнича Дядї виведзена дзецинска представа домашнїх – дзецинскей ґрупи Драмского студия „Арт” Дому култури Руски Керестур. То представа „Цифровани яблука” Ивани Деспотович по мотивох приповедки „Яблуко” Драґана Лукича у режиї Ксениї Бодянец.
Представа ґенерално о доброти, а нєпреривно ше прецагує питанє хто поє яблука, за хтори ше однїмали и особи з познатих сказкох, и позитивни и неґативни. На концу, яблука заш лєм поєдза дзеци – брацик и шестричка хтори найщирши. Ту прецагнуте и порученє родичом же би ше нє вадзели, бо дзеци прето церпя, а промововане и здраве костиранє.
„Цифровани яблука” на Мемориялє и премиєрно виведзени, а першираз бавела нова ґенерация керестурских малих ґлумцох, од першей по штварту класу. Осемнац улоги витворели Емина Бики, Андреа Надь, Алексей Роман, Дарио Кишюгас, Яна Варґа, Филип Илич, Емина Няради, Филип Ноґо, Сташа Малинович, Юлияна Бодянєц, Матея Папуґа, Анита Чизмар, Ана Ґовля, Ема Живкович, Мартина Еделински, Сара Боцка, Патрик Варґа и Аня Симич.
Текст представи преложел Владимир Бодянец, суфлерки и инспициєнтки були Марина Надь и Ивана Планчак, костимоґраф Таня Орос, музични сотруднїк и тон-майстор Михайло Бодянец, майстор шветла Сашо Палєнкаш, виробок маскох Тияна Бандич Сопка, а сценски майстор Мирон Хрин.
Вецей фотоґрафиї мож поопатрац у нашей фотоґалериї.
