НОВИ САД – Зоз шветочносцу на Площи ґалерийох, штварток 1. юния, означени конєц роботох на обнови фасади и вообще, будинку Ґалериї Матици сербскей и 170 роки єй постояня. Ґалерия обновена и у рамикох пририхтованя за Европску престолнїцу култури, а госцох на шветочносци привитали управнїца Ґалериї матици сербскей др Тияна Палковлєвич-Буґарски, предсидатель Покраїнскей влади Иґор Мирович, помоцнїца министра култури и информованя у Влади Републики Сербиї Александра Фулґоси и предсидатель Вивершного одбору Войводянскей банки Маринос Ватис.
Управнїца Ґалериї Матици сербскей Тияна Палковлєвич-Буґарски виявела же то важни дзень за Ґалерию, бо зоз законченьом кладзеня фасади заокружени петнацрочни процес трансформациї установи и дзешецрочне реконструованє будинку, та з тим отворени и нови бок у єй роботи.
Предсидатель Покраїнскей влади Иґор Мирович наглашел же Матица сербска фундамент националного и културного єства, и же потримовка такей и подобним институцийом нє лєм обовязка, алє и привилеґия.
– Привилеґия, прето же ше з їх очуваньом одлужуєме нашим предком, а наступним ґенерацийом охабяме найвозвишенши свидоцтва о народу котрому припадаю – гварел Иґор Мирович и дополнєл же ше предлужує заєднїцку роботу на реконструованю найзначнєйших установох култури у Новим Садзе и Войводини, у пририхтованьох за Европску престолнїцу култури 2021. року.
Шветочну програму пририхтала Ґалерия Матици сербскей, у сотруднїцтве з Академию уметносцох у Новим Садзе, а з потримовку Фондациї Нови Сад 2021. рок. На програми виведзена уметнїцка шветлосна проєкция на обновеней фасади, автора проф. Срдяна Радаковича, а шветлосни ефекти були провадзени з музичнима композициями проф. на Академиї уметносцох у Новим Садзе Небойшу Йована Живковича, хтори виведли студенти Академиї.
Попри числених Новосадянох, на шветочней програми присуствовали и предсидателька Народней скупштини Републики Сербиї Мая Ґойкович, амбасадор Велькей Британиї у Сербиї, представителє церквох, представителє Универзитету у Новим Садзе, представителє републичних, покраїнских и городских орґанох
