ПРИВИНА ГЛАВА – Вчера, на Дзень ошлєбодзеня Шиду, кеди ше означує и Дзень општини, покраїнски секретар за польопроивреду, водопривреду и лєсарство Вук Радоєвич у обисцу пензионера Николи Єшича у Привиней Глави, шветочно придал на хаснованє водовод за тот валал, як и за Бикич.
Ресорни секретарият за тоту намену опредзелєл 20 милиони динари, а 21 милион обезпечени зоз буджету локалней самоуправи у Шидзе. Длужина водоводней мрежи виноши коло шейсц километри.
Радоєвич у провадзеню предсидателя Општини Предраґа Вуковича, його заменїка Зорана Семеновича, предсидателя Дочасового цела МЗ Бикич Деяна Бобаля и МЗ Привина Глава, предсидательки Дочасового цела МЗ Привина Глава Катарини Митрович, як и Александра Йовановича, директора ЯКП „Водовод” нащивел студню хтора ше находзи у Привиней Глави.
У Бикичу ше за прикапчованє на водовод приявело 70 обисца од 100, а у Привиней Глави 35 од 50. Цена прикапчованя виноши 36 000 динари и годно ю виплациц на 10 рати.
Вук Радоєвич нависцел и же Секретарият будзе софинансовац и водовод у Люби у 2019. року, а потим остало же би ше обезпечело водоводну мрежу и у Моловину.