РУСКИ КЕРЕСТУР – Основна школа „Петро Кузмяк” вчера вечар зоз шветочну програму у Велькей сали Дому култури випровадзела своїх 44-их малих матурантох. На програми школяром подзелєни дипломи и припознаня, а потим у школскей єдальнї орґанизовани матурски вечар.
Мали матуранти з двох оддзелєньох, з директорку Школи Хелену Пашо Павлович, своїма учительками Блаженку Бодянец и Веруну Медєши, оддзелєнскима старшинами Зденком Шомодїйом и Лидию Пашо, як и другима наставнїками, после заєднїцкого фотоґрафованя у школским дворе у шветочней колони прешли по центер валалу, односно на програму у Доме култури.
Пригодну програму им пририхтали товарише зоз седмей класи ОШ, а директорка Школи им повинчовала закончєнє основношколского школованя и подзелєла дипоми и припознаня за одлични успих и окремне закладанє з одредзених предметох.
За Школяра ґенерациї преглашена Соня Балїцки з VIII-a оддзелєня, а за найлєпшого школяра у VIII-б оддзелєню вибрана Теодора Новакович. Обидва достали и Вукову диплому, а попри нїх, Вукову диплому достали и Ана Мария Няради, Давор Хома, Ивана Планчак и Желько Сопка. Дипломи за одлични успих достали ище єденацецеро школяре з обидвох оддзелєньох.
Програма закончена з „гимну” осмакох „Петнацрочним” (М. Зазуляк-Лю.Загорянски) хтору шпивала цала ґенерация малих матурантох, їх товарише зоз седмей класи, алє и преполна сала з публику, їх родичи, родзина и други Керестурци.