РУСКИ КЕРЕСТУР – Понеже вчера обявени конєчни резултати Закончуюцого испиту, у школох у Сербиї, та з тим и у рускокерестурскей ОШ „Петро Кузмяк”, маломатуранти нєшка и на ютре, 25. юния, виполнюю лїстини жаданьох за упис до штреднїх школох.
По уписней процедури, на лїстини жаданьох школяре уписую цо векше число шреднїх школох до хторих би ше потенциялно жадали уписац. Школа жаданя уноши до бази податкох Министерства просвити, дзе ше вец розподзелює школярох з цалей Сербиї до шицких штреднїх школох.
Точносц унєшених податкох з лїстини жаданьох школяре у керестурскей Школи годни превериц 29. юния и евентуално ше жалїц на нєточносци, а 30. юния до 12 годзин Министерство ма обявиц службени лїстини жаданьох.
Резултати розподзельованя школярох по школох и образовних профилох, як и шлєбодни места, службено маю буц обявени 3. юлия, а 4. и 5. юлия будзе перши уписни круг.
Други уписни круг будзе 7. юлия, а лїстини жаданьох за други круг ше виполнює 4. юлия.