Прешли пондзелок бул, голєм по думаню фаховцох, найдепресивнєйши дзень у цалим року. Психолоґове треци пондзелок у януару дефиновали як „смутни пондзелок“, насампредз пре стан на рахунку и у бутєлару после шветох. Окрем того, на депресивни пондзелок вплївую и нїзки температури и факт же швета закончени, длуства, нїзки уровень мотивациї, час котри прешол од наших нєуспишних пробованьох же бизме дацо пременєли и час котри потребни же бизме превжали акцию.
Як науковци твердза, а верим же и статистика так указує, януар мешац у котрим ше людзе найчастейше розходза, алє и мешац у котрим на Твитеру поставени найвецей неґативни порученя.
Єден з найвекших проблемох кед швета попреходза – празни кишенки. За швета ше троши и купує як да ютре почнє война. У тей предкрачунскей/предноворочней еуфориї становела сом ше у популарним шопинґ центру. Людзе як омрачени понагляли по предавальньох, виходзели з огромнима мещками и дарунками. Шицки лєм преходзели коло штанду НУРДОР – Националного здруженя родичох, чийо дзеци маю рак. И нє дзбали. Кед сом пришла ґу штанду, видзела сом же у превидней шкатулки єст даскельо двацетки и пейдзешатки. А коло штанду ше дриляю людзе котри потрошели тисячи, можебуц и дзешатки тисячи на шмати, ципели, ґачи, пахнячки. Познам жену котра активна у тим здруженю и чийо дзецко мало дияґнозу. Познам и другого хлапчика котри тей єшенї нє почал до школи, тиж пре канцер. Прешол шицки фази лїченя, чека же би му змоцнєл имунитет и виросли власи же би могол до школи, ґу парняком. Алє то, випатра, важне лєм тим дзецом и их родичом. Тим цо купую – очиглядно нє.
Точни податки о чишлє нєт, алє гражданє Сербиї депресивни пре длугорочну виложеносц стаємному стресу. Людзе безвольни и напарти пре санкциї, войни, бомбардованя, безпенєжносц. Моя пайташка, лїкар общей пракси, гвари же людзе приходза и отворено питаю лїки за змиренє. Гоч яки, нє важне, лєм най випише рецепт. Кед ше спроциви, находза тисяч причини пре котри им седативи требаю. Лєм же би достали рецепт. Яка часц нациї седирана, верим же нїхто нє зна. Алє то леґалне, скоро кажда мама ма свойо целово пилулки, тета и баба – белави. За татох нє знам. Можебуц пию седативи, можебуц алкогол. Углавним, тото видза и дзеци, и тинейджере и здобуваю упечаток же лєгчейше исц през живот седирани. Уж напредок ше рихтаю же им живот будзе шиви, допити, велька терха. А нє муши буц. И нє шме. То задаток за родичох – место же би ше фокусовали на власни бриґи и нєдостаток пенєжу, дзецом муша указац же єст вредносци у живоце за котри ше треба бориц. Як цо ше родичи зоз НУРДОР-у кажди дзень шмело зочую зоз животом и страхом, пре свойо хори дзеци.
Становиска висловени у тим тексту виключно авторово и нє вше одражую ушорйовацку политику новинох „Руске слово”.