Активне жительство за квалитетни животни штредок

автор сен
999 Опатрене

РУСКИ КЕРЕСТУР – Найзначнєйши еколоґийни проблеми Руского Керестура то безправне винїманє и орезованє древох и заґадзена вода у беґелю, у хторей ше влєце купа вельке число людзох, заключене на вчерайшей схадзки у орґанизациї месного Еколоґийного руху „Желєни персцень“.

Окрем орґанизаторох, на схадзки були значни актере у обласци животного штредку – представителє Здруженя ловарох „Яребица”, Здруженя рибарох „Коляк” Церковного одбору, керестурского оддзелєня полициї, Явного подприємства „Води Войводини” з Вербасу, фаховци з обласци очуваня водох и лєсох, та секретар Месней заєднїци Руски Керестур Михайло Сабадош.

6-Eko-02[1]

Предсидателька „Желєного персценю” др Леона Доротич Ґутеша гварела же ше роки роби на ожелєньованю валалу, алє резултати нє видно, найбаржей пре людски фактор. На схадзки винєшене же 50 одсто древкох хтори члени Церковного одбору ище скорей посадзели коло драги до Водици повицаговани, понеже завадзали людзом котри жадали прешириц свойо поля. Ґу тому, присутни на схадзки дознали же людзе безправно режу древа и предаваю их за огриву.

Порушана и бешеда о длугорочному проблему брудней води у беґелю, а за його ришованє ше будзе контактовац компетентни фахово особи.

Схадзка зволана пре потребу за сотруднїцтво шицких котрим значна природа и здрави животни штредок, а окрем спомнутих здруженьох и фаховцох, у тим нєобходна и активна учасц жительох Керестура.

6-Eko-03[1]

ПОВЯЗАНИ ТЕКСТИ