Амбуланта за боль и за хороти скори

автор А. Маркович
1.2k Опатрене

У Общим шпиталю Вербас початком мешаца почала робиц Дерматовенеролоґийна амбуланта, так же пре специялистични препатрунок, дияґностику и терапию дерматовенеролоґийних хоротох при дзецох и одроснутих, пациєнти з општини Вербас вецей нє буду мушиц путовац до других здравствених установох.

Як визначел специялиста дерматовенеролоґ др Драґан Вемич, у тей амбуланти ше у континуитету будзе применьовац и здравствено-воспитна робота з пациєнтами. Лїкар у Дерматовенеролоґийней амбуланти др Драґан Вемич, а медицинска шестра Снежана Батинар.

Роботни час Амбуланти у Общим шпиталю кажди роботни дзень помедзи 7 и 14 годзин, а контакт телефон 021 7954 – 567.

Окрем тейамбуланти, у вербаским Общим шпиталю того мешаца почала робиц и Амбуланта за боль у просторийох Анестезиолоґийней амбуланти, и то каждого пиятку од 10 по 12 годзин. Пациєнти годни присц на препатрунок на основи свойого здравственого стану, з упутом од дохтора специялисти або вибраного дохтора общей медицини у Дому здравя.

– Лїченє болю после операциї, хронїчного болю (розличней причини), або болю хтори настал пре малиґнитети, длугорочни и зложени процес, з константним преверйованьом и присподобйованьом медикантозней терапиї, та по тирвацшу терапию з пласираньом епидуралней аналґезиї – гварела анестезиолоґ др Андрияна Марич, хтора ше медзи иншим занїма и з терапию за одстраньованє або зменшанє болю.

Вона додала же барз чежко одредзиц моцносц болю, понеже попри индивидуалного дожица барз значна и емоционална компонента. Окрем того, моцносц болю нє єдина одреднїца у дияґностики, бо дакеди барз чежки хороти напредую без, або зоз барз мало боляцима сензациями.

Маричова здогадла же фахови и персонализовани приступ ґу каждому пациєнтови оможлївює одркиванє причини болю,  а єден з третманох у терапиї хтори у вербаским Шпиталю ше будзе применьовац после терапиї физикалней медицини, то и акупунктура.

opsta bolnica vrbas

ПОВЯЗАНИ ТЕКСТИ