ЛЬВОВ (УКРАЇНА) – Ана Римар з Петроварадину участвовала на Медзинародним науковим конґресу хтори бул пошвецени 160-рочнїци народзеня Ивана Франка, а хтори отримани од 22. по 24. септембер на Львовским националним универзитету „Иван Франко” у України.
Ана, студентка докторских студийох язика и литератури на модулу литература на Филозофским факултету у Новим Садзе и стипендиста Министерства просвити, науки и технолоґийного розвою Републики Сербиї, була єдина з нашей жеми медзи коло 300 учашнїками Конґресу з осем державох швета, медзи котрима були студенти докторских студийох, асистенти, професоре з универзитетох и науковци.
Римарова свою роботу викладала на українским язику трецого дня Конґресу, а єй тема була „Рецепция Ивана Франка у творох Михайла Ковача”.
Медзинародни наукови конґрес орґанизовало Министерство просвити и науки України, Львовска реґионална державна администрация, Львовска реґионална рада, Львовски национални универзитет „Иван Франко”, Прикарпатски национални универзитет Василя Стефаника, Институт литератури „Тарас Шевченко” Националней академиї наукох України и Институт Ивана Франка Националней академиї наукох України.