ВЕРБАС – Совит за безпечносц транспорту у општини Вербас орґанизовал вчера явну презентацию числених активносцох з хторима ше тото цело занїмало у предходним периодзе, порушаних пре виробок Стратеґиї безпечносци транспорту од 2016. по 2020. рок. Тот документ би мал достац потримовку Скупштини општини Вербас уж на шлїдуюцей схадзки, наявене на презентациї, а преноши портал Општини Вербас.
Явносци представени штири проєкти – „Стратеґия безпечносци транспорту”, потим „Знїманє драги зоз специялизовану превозку пре идентификованє локацийох и транспортно-технїчних и безпечносних характеристикох часцох драгох на хторих будзе применєна система видео-надпатрунку, з предкладанями ришеньох за поставянє системи”, „Идентификация опасних местох – „чарних точкох” на териториї општини Вербас, з предкладанями мирох за их санацию”, як и проєкт „Анализа стану безпечносци дзецох у транспорту на териториї општини Вербас, з елаборатами о безпечносци у транспорту у зонох основних школох”.
З проєктами и їх резултатами на схадзки представени и активносци за унапредзованє безпечносци у транспорту у наиходзацим периодзе, а визначене же през проєкти одредзени и мири хтори по 2020. рок буду запровадзовац шицки часци системи одвичательней за безпечносц у транспорту.
На презентациї присуствовали и заменїк началнїка Управи транспортней полициї Министерства нукашнїх дїлох Бобан Милинкович, помоцнїк директора Аґенциї за безпечносц транспорту Милан Илич и началнїк Оддзелєня за локални самоуправи Бранко Стаматович, представителє општинох Бач, Бачки Петровец, Србобран, Кула и Мили Идьош, та городох Зомбор, Крушевац и Нови Сад, представителє числених установох, службох, подприємствох, авто-школох и други.