Владика на Треци дзень Велькей ноци у Дюрдьове

автор бас
1.3k Опатрене

ДЮРДЬОВ – Вельку ноц по юлиянским календаре у церкви Рождества Пресвятей Богородици у Дюрдьове парохиянє преславели з госцами з других местох и державох, а вчера, на Треци дзень Велькей ноци, и з нашим апостолским еґзархом, владиком Георгийом Джуджаром, котри предводзел Архиєрейску Службу Божу на 9 годзин. Сослужели дюрдьовски и ґосподїнски парохове о. Йоаким Холошняй и о. Михаил Холошняй, а домашнї парох служел и вчерайшу Малу Службу на 18 годзин, по хторей було мированє.

На Перши дзень Велькей ноци, на 9 годзин, Вельку Службу служели о. Ференц Євицки з Тисауйварошу у Мадярскей, о. Борис Холошняй и о. Йоаким Холошняй. На Служби шпивал Церковни хор „Розанов”, под дириґенством Татияни Барна, а з нїма шпивал и о. Михаил Холошняй. Швичакаре по традициї були виронаучни дзеци з дюрдьовскей ОШ, а по Служби у церковней порти пошвецени кошарки з пасхалним єдзеньом.

Позавчером, на Други дзень Велькей ноци, Вельку Службу Божу на 9 годзин служел о. Борис Холошняй, а на 18 годзин Малу Службу о. Йоаким Холошняй.

ПОВЯЗАНИ ТЕКСТИ