РУСКИ КЕРЕСТУР – Всоботу, 23. априла, закончени тогорочни 48. Драмски мемориял Петра Ризнича Дядї, на хторим виведзени 11 представи драмских ансамблох з наших местох – седем за старших и штири дзецински. Под час Мемориялу була орґанизована и вистава подобових роботох Кристини Ґшвенґ з Вербасу.
Фестивал завар Руски народни театер (РНТ) „Петро Ризнич Дядя” зоз свою найновшу представу „Цо видзела послуга” Джона Ортона, у режиї Владимира Надя Ачима.
И попри тим же тота представа у Керестуре тераз виводзена уж треци раз, сала була досц пополнєта. Патраче могли видзиц прави „бал под масками”, динамични сцени и нєпреривне заменьованє улогох и костимох. Пре прешвечлїву ґлуму и компликовани змист, патрачом аж на концу було ясне порученє.
Ґлумецку екипу творя Славко Орос, Снежана Малацко, Михайло Варґа, Емил Няради, Ненад Канюх и Ребека Планчак, а награду за найлєпше виводзенє того вечара достал Михайло Варґа, котри толковала улогу „Др Ренса”.