РУСКИ КЕРЕСТУР – Драмски студио АРТ Дому култури Руски Керестур всоботу, 16. априла, на Мемориялє виведол младежску представу Олександра Витера „Сезона лову на ловара”, у режиї Владимира Надя Ачима, котри и преложел текст, адаптовал го, обдумал сценоґрафию и вибрал музику.
У представи ґлумя три штредньошколки – Адриана Надь, Ребека Планчак и Тамара Будински, котри з тоту комедию ситуациї нашмеяли нє барз вельке число публики, а мушело ше осторожно провадзиц дїю же би ше на концу зрозумело хто ту кого „уловел”.
Заплєт правени на замени идентитетох, а аж до штирох улогох схопно и з лєгкосцу ше трансформовала Адриана Надь, котра достала и награду публики жирия за найлєпше одбавену улогу у тей представи.
Понеже то було уж шесте виводзенє тей представи у тей театралней сезони, видно же є убавена и з потребним „темпо-ритмом” и добрим висловом трима увагу публики.