У старей церкви св. Рока у Дравльох у Любляни (Словения) пондзелок, 28. марца, на Други дзень Велькей ноци служена Служба Божа за грекокатолїкох. Служел парох зоз Метлики о. Михайло Йосафат Гарди, а шпивац му помагали Словенци – брат францискан Ян Доминик Боґатай и богослов Альоша Кодба. Присутни були Руснаци, по походзеню зоз Руского Керестура, Нового Саду и Вербасу, Українци зоз Босни и України, Словенци грекокатолїки и приятелє наших вирних.
Грекокатолїки ше даскельо раз у року, на векши швета зиходза у церкви у Любляни, а дакеди маю и архиєрейску Службу Божу, хтору служи владика зоз Заґребу Никола Кекич.
Стретаю ше и у тижню молитви за єдинство християнох, кед на Богослуженю шпива хлопски екуменски хор хтори у Словениї активни уж петнац роки.