НОВИ САД – Город Нови Сад розписал конкурс за орґанизованє явних роботох на хтори ше можу приявиц роботодавателє котри сцу анґажовац особи котри чежше доставаю роботу. Окрем того, ище вше актуални конкурс за доставанє субвенцийох за отверанє нових роботних местох.
За явну поволанку за орґанизованє явних роботох од интересу за Нови Сад опредзелєни 11,6 милиони динари, а обчекує ше же з тоту миру роботу достаню коло 60 особи з евиденциї Националней служби за обезпечованє роботи. Приявиц ше мож по 6. май.
Єднократни субвенциї по 200 000 динари годни достац роботодавателє з териториї Городу Нови Сад за отверанє нових роботних местох. Приоритет у обидвох конкурсох буду мац роботодавателє котри анґажую особи котри чежко доходза до роботи – особи котри длуго нєзаняти, звишки занятих, млади до 30 роки, старши од 50 роки, жени, особи з инвалидитетом, Роми и самохрани родичи.