РУСКИ КЕРЕСТУР – Пред мини-концертом, вчера на „Дньовки” означена и 10- рочнїца младежскей радио-емисиї „Останьце нашмеяни” Радио Нового Саду (РНС).
Водительки и авторки младежскей радио-емисиї „Останьце нашмеяни” Саня Маркович и Саня Полдруги (Два Санї), як и одвичательна редакторка Програми на руским язику РНС Златица Няради, през бешеду и фотоґрафиї вельочисленим нащивительом представели 10-рочну роботу у тей младежскей емисиї.
Попри означованя ювилею, промоцию вихасновали и поволац младих од 16 до 25 роки же би ше приявели на авдицию за водительох спомнутей радио-емисиї, хтора будзе отримана 21. януара у Новим Садзе. Там будзе и остатня промоция емисиї з нагоди ювилею, а пред тим нащивя и други нашо места.
Дводньову мултимедиялну манифестацию младих „Дньовка”, 18. по шоре, у мено орґанизатора – Младежскей орґанизациї „Pact Ruthenorum” – отворел предсидатель „Pactu” Яким Винаї. Остатнї роки „Дньовку” ше отримує у рамикох „Костельниковей єшенї”.
По законченю програми учашнїки, нащивителє и орґанизаторе „Дньовки” полнолїтносц тей манифестациї преславели и з торту и коктелом, а заинтересовани ше могли фотоґрафовац на промотивним банеру радио-емисиї „Останьце нашмеяни”.
