БАЧ/РУСКИ КЕРЕСТУР – На Купу Войводини за шицки катеґориї и дисциплини каратистох, хтори у Бачу отримани всоботу, 14. новембра, Карате-клуб (КК) Русин представяли єденацецеро млади каратисти, з котрих ше дзевецеро пласовали на Куп Сербиї, а пласман на найвисше змаганє у держави виборели и три екипи Русину.
У катеґориї когуцикох у поєдинєчних борбох 1. место освоєл Ґлориян Штранґар, а на Куп Сербиї ше пласовал и з освоєним 8. местом у катох-поєдинєчно. У катеґориї когуцикох ше змагали и Мирко Малацко и Иван Медєши, котрим то бул перши наступ за Русин на даєдним службеним змаганю.
Екипа пионирох, хтору творели Ґлориян Штранґар, Андрей Дудаш и Теодор Няради у борбох освоєла друге место, а у борбох-поєдинєчно Дудаш и Няради на Купу Войводини освоєли треци места.
Успишни були и каратистки у катеґориї надїйох, понеже у поєдинєчних борбох перши места освоєли Сара Планчак и Мартина Рац, друге Марина Надь, а треце Анамария Няради, док як екипа у борбох, спомнути штири каратистки освоєли перше место.
У конкуренциї кадетох екипа Русину, хтору творели Андрей Катона, Даниєл Кормош и Андрей Гарди у борбох освоєла друге место, а з освоєним шестим местох у поєдинєчней конкуренциї у борбох, Гарди ше пласовал на Куп Сербиї.
На Купу Войводини у Бачу КК Русин мал представителя и медзи судиями, понеже єдна зоз судийох була Вероника Юрич.
