СЕРБИЯ – Вчера почало приявйованє за упис на державни факултети и високи школи фаховох студийох и тирва до нєдзелї, 28. юния. У академским 2015/2016. року на буджет будзе уписани 9 461 студент першого року на основних фахових, академских и интеґрованих студийох, а найвецей буджетски места будзе на Универзитету у Беоґрадзе, хтори ма и найвецей факултети и високи школи.
Цени школаринох ше рушаю од 56 000 до 240 000 динари, а найдрагши Архитектонски факултет и напрям софтверске инжинєрство на Електротехнїчним факултету у Беоґрадзе, цо и найпопуларнєйши напрями медзи будуцима студентами. На Беоґрадским универзитету обчекую же велька конкуренция будзе и на Факултету орґанизацийних наукох (ФОН) и Факултету безпечносци, дзе за єдно место буду конкуровац три особи.
У Новим Садзе туньши студиї, а найвекша школарина – 160 000 динари – на Интеґрованих студийох медицини на Медицинским факултету, за хтори уж роки єст вельо заинтересованих.
Приємни испити на державних факултетох у Сербиї ше будзе покладац од 29. юния по 3. юлий, а уписи буду од 10. по 15. юлий, у зависносци од розпорядку на факултетох.