КОЦУР – Вчера закончене нащивйованє старим, хорим и нємоцним жительом Коцура, акция хтору орґанизовали волонтерки коцурского Каритасу и манастир шестрох служебнїцох. Нащивени петнац обисца, и до каждого Мария Буила, Марґарета Фаркаш ш. Михаила Воротняк однєсли пакет поживових продуктох, до дзепоєдних и облєчиво.
Средства за тоту гуманитарну акцию обезпечени з пенєжу назбераного у децембру прешлого року у Тижню Каритасу, на Крачунским сайме, як и з добродзечних прилогох. Вєдно назберани 19 000 динари, а попри спомнутого, часц з того пенєжу будзе опредзелєна и за роботнї з дзецми з окремнима потребами и за други потреби.
Як за Рутенпрес гварели волонтерки коцурского Каритасу, гуманитарни акциї були успишни, а за Вельку ноц планую ище єден гуманитарни саям ручних роботох, хтори уж пририхтую.