РУСКИ КЕРЕСТУР – Всоботу, 25. априла, з представу „Тяпаковци” ґлумцох професийного русинского Театру Александра Духновича (ТАД) з Пряшова, зоз Словацкей, заварти тогорочни 47. Драмски мемориял Петра Ризнича Дядї, хтори тирвал од 17. априла.
Роман „Тяпаковци”, авторки Божени Сламчиковей-Тимравей, єдно з найпознатших литературних творох у Словацкей, спада уж до класики, до часу критичного реализму, а за театер го драматизовал Марек Турошик. Текст на русински преложел Штефан Сухи, представу у ТАД як госц режирал єден з найпознатших словацких режисером Матуш Ольга, а премиєра була у октобре 2010. року и на репертоаре є нєпреривно и нєшка.
Гоч з елементами комедиї представя барз лєнїву вельочислену Тяпакову фамелию, текст у велїх сеґментох нагина ґу драми, з чим наглашени поєдинєчни нєщешлїви судьби єй членох. З критику нєроботи, миреня зоз судьбу, нєприставаня на пременки, а у случаю драматизациї за русински театер опомина и на вше присутне „помодарство”, же цудзе випатра лєпше як твойо – текст универзални за шицки часи.
Одлични ґлумци старшей и младшей ґенерациї ТАД, у добрей инсценациї, сценоґрафиї и шицкима другима деталями хтори творя театер, Керестурцом и другим указали як ма випатрац права професийна театрална представа, а з госцованьом Театру з Пряшова, на найшветочнєйши способ заварта тогорочна смотра театралней творчосци Руснацох у Сербиї. Терашнє госцованє ТАД на мемориялє витворене дзекуюци Спорозуменю медзи АП Войводину и Пряшовским самоуправним крайом.
Тогорочни Драмски мемориял Петра Ризнича Дядї бул єден з репертоарно богатших, понеже на нїм наступели аж 13 театрални представи – осем за старших и пейсц дзецински, односно за дзеци, з руских местох у Войводини и Горватскей, а два представи були госцуюци. Под час Мемориялу тирвала и вистава маскох Милоша Лишанина Пифкия з Руского Керестура, а отримани и округли стол о терашнїм стану у нашей театралней дїялносци.
Орґанизатор Мемориялу бул Дом култури Руски Керестур, а финансийно го потримали Национални совит Руснацох, покраїнски секретарияти за културу и явне информованє и за образованє, управу и национални меншини-заєднїци, Министерство култури, Општина Кула и Месна заєднїца Руски Керестур.
На правим боку сайту „Руского слова” и Рутенпресу поставена окремна ґалерия фотоґрафийох з представох и збуваньох на тогорочним Мемориялє.