РУСКИ КЕРЕСТУР – Пред урядовим отвераньом 48. Драмского мемориялу Петра Ризнича Дядї нащивителє вчера вечар мали нагоду опатриц подобову виставу у поп-арт стилу младей уметнїци Кристини Ґшвенґ з Вербасу.
Виставу отворела редакторка младежского часопису „МАК” Мая Зазуляк, котра визначела же тот часопис мал одличне сотруднїцтво з Кристину. Окрем у „МАК”-у, єй роботи представени и на колективних виставох у „Студию М” у Новим Садзе и на Ноци музейох у Вербаше. Дотераз мала два самостойни вистави у Вербаше, а вчера була и друга самостойна у Руским Керестуре.
Кристина ше упатра на Роя Лихтенстайна, єдного зоз сновательох поп-арт напряму, а инспирацию за свойо роботи находзи у музичарох, женских портретох, у винтидж, пин-ап фотоґрафийох.
При нашей младей уметнїци мож стретнуц уж препознатлїви винєти и особи зоз стрипох, предмети хтори ю окружую, як и єй окреме милу тематику – портрети женских особох. Конкретни рукопис и рижнородносц мотивох даваю окремни уметнїцки печац тей младей уметнїци, а єй роботи ноша окремну енерґию и попатрунок на уметносц, гварел о єй роботох наш визначни подобови уметнїк Владо Няради.