РУСКИ КЕРЕСТУР – З фарбеньом огради, ручкох и драбинкох на базену, вчера закончена роботна часц Медзинародного волонтерского кампу у Руским Керестуре. После одпочивку през викенд, на пондзелок почнє и едукативна часц, дзе волонтере буду участвовац у роботньох хтори промовую мултикултуралносц Войводини.
З Любицу Няради буду участвовац у правеню традицийних єдлох, а будзе им приказане и народне облєчиво Руснацох, Сербох, Мадярох, Українцох и Словацох. Кажди дзень ше будзе представяц по єдну националносц, а перши буду Руснаци з Руского Керестура. Идуци днї буду приходзиц госци других народносцох з местох дзе жию, а волонтере годни пробовац и їх традицийне облєчиво.
Кажди рок у витворйованю волонтерского кампу участвує и Конїцки клуб „Русин”, чийо члени на пондзелок, 11. юлия, пред вечаром волонтерох повожа на кочох по валалє.
Рижнородносц народох у Кампу и тема роботньох прицагуюца и медийом, та на пондзелок, 11. юлия, приход на Камп до Керестура наявела и екипа ТВ-емисиї о националних меншинох „Граждан” Радио-телевизиї Сербиї.