КУЛА – Сербска напредна странка (СНС) вовторок, 19. априла, у кулским Културним центре отримала закончуюцу конвенцию пред виберанками за Скупштину општини Кула. Як з конвенциї поручели напредняки – 24. април будзе „дзень побиди” за СНС и кулску општину.
На предвиберанковей конвенциї Општинскей орґанизациї СНС Кула представени кандидати за одборнїкох у локалним парламенту, як и кандидати за покраїнских и народних посланїкох. Кандидат за предсидателя Општини Кула спред СНС Перица Видеканїч з присутнима подзелєл одушевиє з барз вельким одозваньом людзох на конвенцию, цо оценєл як вельку потримовку тей странки од Кулянцох и жительох општини. Визначел важносц того же би СНС достала и покраїнского премиєра бо, як гварел, републичного уж ма, а то Александар Вучич и вец, як гварел, „Сербия зєдинєна будзе победзовац”.
– Кед ше у наступних штирох рокох будземе бориц за лєпшу Кулу и лєпшу Сербию, млади нє буду одходзиц до иножемства, алє буду оставац у Кули и ту сновац фамелиї. Я вас поволуєм на борбу, алє нє за власц, но на борбу за будучносц – гварел Видеканїч.
Терашнї заменїк предсидателя Општини и кандидат за општинского одборнїка Велибор Милоїчич тиж виражел задовольство пре вельку потримовку напредняком и пре їх єдинство, а на дотераз поробеним окреме подзековал предсидательови Општини Кула Драґанови Трифуновичови.
На конвенциї у Кули бешедовал и подпредсидатель СНС Иґор Мирович, котри наглашел же 24. априла будзе зменєта покраїнска власц и Боян Пайтич, бо, як гварел, „вецей нєт смисла же би гражданє свой глас давали тим котри их спреведали”.
– З моцу странки предводзену з нашим предсидательом Александром Вучичом и з пожертвовну роботу застановели зме препаданє Сербиї – гварел Мирович, як и же пре добри резултати хтори Влада витворела за остатнї 2 роки, премиєр наявел можлївосц звекшованя плацох и пензийох.
Член Предсидательства СНС и городоначалнїк Нового Саду Милош Вучевич похвалєл кулске општинске руководительство, бо за три роки водзело одвичательну политику спрам гражданох, визначуюци и же Сербия за остатнї два роки достала политичну стабилносц и зазначела видлїви резултати.
На конвенциї у Кули бешедовал и секретар Спортского союзу Сербиї Владимир Батез, а пре барз вельке интересованє гражданох за вовторкову конвенцию СНС, за тих котри нє могли войсц до сали, опрез Културного центру бул поставени вельки видео-бим, прейґ хторого провадзели збуванє.
