РУСКИ КЕРЕСТУР – На вимогу Месней заєднїци Руски Керестур, покраїнски инспектор за защиту животного штредку Драґан Секулич штредком септембра обишол заґадзени беґельчик КЦ3, познатши як Стари беґель. Як гварел за Рутенпрес, на основи увиду заключел же главни заґадзовач того беґелю Хладзальня „АБЦ фуд”.
Гражданом котри жию коло беґелю його заґадзеносц вельки проблем пре вше присутни смрод, а дзепоєни днї є нєподношлїви. Инспекторе и скорей виходзели на терен, алє дотераз ище нїч конкретно нє ришене.
Хладзальня ма пречисцовач, медзитим, пре причини хтори ище маю буц утвердзени, до беґелю КЦ3 заш лєм чуря одрутни води. Инспектор Секулич гварел же у наихозацим периодзе треба окончиц шицки випитованя и до конца рока робиц на виробку окремного акцийного плану за ришованє того проблему.
Як гварел, компанийом як цо то „Апатинска пиварня” и „Сомболед” требало пейц роки ришиц таки проблеми, та за обчековац же тельо часу будзе потребне и за беґель у Керестуре, окреме же нови законски предписаня заґадзовачом даваю 10 роки же би ше им прилагодзели.
Гоч то барз длуги часови период, инспектор оценєл же смрод спричинюю орґански материї хтори нє загрожує здравє гражданох, та стан нє драматични.
Урядови звит з покраїнского инспекторату до Месней заєднїци би мал сцигнуц пошвидко, а з нїм и одлука о дальших и конкретних крочайох у ришованю того проблему.