За Скупштину Городу Нови Сад 10 лїстини

автор саб
1.3k Опатрене

НОВИ САД – Городска виберанкова комисия (ГИК) Нови Сад дотераз преглашела 10 лїстини за локални виберанки 24. априла. Скупштина Городу Нови Сад ма 78 одборнїкох.

Перша преглашена лїстина „Александар Вучич-Сербия победзує”, на хторей 78 кандидата, а перши на нєй Милош Вучевич, актуални городоначалнїк Нового Саду. Попри членох Сербскей напредней странки (СНС), на тей коалицийней лїстини коло СНС и члени Социялдемократскей партиї Сербиї, Сербского руху обнови, Партиї зєдинєних пензионерох Сербиї, Руху социялистох и Новей Сербиї.

Друга преглашена лїстина „Лига социялдемократох Войводини-Ненад Чанак”, на чолє з предсидательом странки Ненадом Чанком и на городских виберанкох ЛСВ наступа сама. На лїстини 60 кандидати.

Треца преглашена лїстина „Ивица Дачич-Социялистична партия Сербиї (СПС), Єдинаствена Сербия (ЄС)-Драґан Маркович Палма”. Перши спомедзи 78 кандидатох Слободан Цветкович.

Штварта преглашена лїстина „Др Воїслав Шешель-Сербска радикална странка”. На  лїстини 78 кандидати, а перши Дюрадь Якшич. Пията преглашена лїстина „Союз войводянских Мадярох-Иштван Пастор”, ма 27 кандидатох, а перши Дюла Киш.

„Демократска странка-Др Велько Крстоношич” шеста лїстина хтору преглашела ГИК, а окрем демократох, на лїстини и кандидати Новей, Демократского союзу Горватох Войводини и Мадярского союзу. На лїстини 78 кандидати.

Седма преглашена лїстина „Двери-Демократска странка Сербиї-Санда Рашкович Ивич-Бошко Обтрадович”. Лїстина ма 52 кандидатох а перши Борко Илич. Осма преглашена лїстина „Народни рух Динара-Дрина-Дунай-Томислав Бокан”, на хторей  74 кандидати, а як зевята преглашена лїстина „Желєна странка”, хтора ма 26 кандидатох, а перши мр Ґоран Чабради.

За тераз остатня, 10. преглашена лїстина за локални виберанки у Новим Садзе „Борис Тадич, Чедомир Йованович-Союз за лєпши Нови Сад, Социялдемократска странка, Либерално-демократска партия, Желєна еколоґийна партия-Желєни”. Лїстина ма 26 кандидатох, а перши медзи нїма др Ґеорґиос Константинидис.

ПОВЯЗАНИ ТЕКСТИ